唔經唔覺,小編由學影相到而家原來已經有廿幾年。由當年既AFSLR菲林單反,到而家既Mirrorless無反,外界對攝影愛好者既印象都經歷過幾番轉變。
小編90年代開始接觸攝影既時候,當時攝影風氣無而家咁普及,甚至可以算係小眾既興趣。小編升U既時候,同班竟然搵到兩個攝影愛好者,都可以算係奇蹟。加上當年網上資訊都無咁多,攝影及相機操作知識唔容易搵,小編就咁拎住部Nikon F70入門單反加支天涯鏡,其他人已經覺得小編好專業、好有型。1997年郭富城既《愛的呼喚》,佢係MV入面既攝影記者造型,簡直就係型格攝影人既代表!
《愛的呼喚》MV
後來數碼相機興起,多咗好多朋友玩攝影。但係與此同時,報章雜誌開始出現多了關於攝影文化的報導,不論係人像攝影愛好者,定係西洋菜街影promotion girl既人、拎住相機追星既fans,總之拎住專業單反既業餘攝影愛好者,統統冠以「龍友」之名。仲有個別案件,拎住部相機話自己係攝影師既人,約女仔出黎私影為名me too為實,媒體報導往往將疑犯以「龍友」稱之。往後一班影友相約模特兒進行人像創作攝影,亦竟然畀人用有色眼鏡看待。小編唔少朋友都係人像攝影愛好者,影相時一向循規蹈舉點到即止,唔少仲做埋全職攝影師。將「龍友」一詞與「鹹濕佬」拉上關係,小編實在大感心痛,惟有一有機會就同人講,攝影人係好似發哥、華哥、Eason、古天樂咁有型咁正派架,人像攝影師係好似葉青霖咁專業架,希望攝影人既形象唔好再沉淪落去。
圖片來源︰賓離套
近年攝影文化有所轉變,唔少年青攝影師透過本地拍攝到的風景作品,喺多個國際攝影比賽取得佳績為港爭光,同時亦令到香港普羅大眾更加認識香港既城市、郊野面貌,真正令到香港人「欣賞香港」。雖然「龍友」呢個詞近年都比較少聽喇,不過一般攝影愛好者形象都轉向低調,少咗人用大Logo相機帶、攝影背心、大拖喼大背囊呢類較為搶眼既裝備。無論如何,希望社會唔會再出現對於攝影既偏見同誤解啦!