15 May 2019
話說當日，一朝早已經有海霧，但由於筆者懶，同埋覺得海霧都就快冇㗎啦，一直拖到1:30pm先出門口。搭車時候經過觀塘繞道，仲見到有海霧，以為有機，點知已經接近尾聲，影得一張...
是日出動鏡頭
正式開始...
一落車第一步馬上搵開揚景觀，但當搵到時候，已經開始收收地皮...
160mm iso160 f11 1/400
之後，就去補食早餐，係步緊過去途中，拎住28-300試下街拍，原來呢枝鏡長焦時候，對焦距離都幾遠下，即係個散景距離都幾多下，不過由於係現代鏡又係變焦鏡，枝鏡果條對焦碼都唔知show緊幾多mm，故無從稽考對焦距離。
同埋用枝鏡都一段日子，係咁e share下我對呢枝鏡有咩感想同特點。變焦個range咁闊構圖的而且確好毑方便，同埋減少換鏡機會，好多時即場發生既事，都可以影到。不過佢都有缺點，筆者發現枝鏡影出黎偏暗，要比其他鏡推高1～2級iso，先至能夠keep番個快門時間或光度，同埋影夜景嘅時候，如果係好黑山頭或郊野地方，暗部位置更加暗，後製時候幾乎推唔番出嚟。日頭、去旅行呢枝鏡屬於出動頭三位，我評枝鏡有80分。28-300個range咁闊，有時唔使太講求質素，影到就贏！
言歸正傳... 去緊北角途中，發現有條長馬路，中間有安全島，最後有樓，用長焦300mm zoom埋去構圖應該可以。呢張坐左係路邊一陣，呆思左一陣，就有個人從右邊殺出黎，覺得啱timing 於是按下快門！
300mm iso320 f5.6 1/500
跟著，轉個街口又俾我見到有趣構圖，果刻好多車，車好有層次咁由最遠架車高去到最近最矮，好似層層疊砌Lego 咁，而且仲有一眾街拍愛好者，好鐘意影既紅的！理所當然，拎起相機chok番張~
200mm iso320 f5.6 1/320
一直行... 發現斜路上面開始有好多學生放學，開頭我都冇為意到有乜咁好影，啱行多兩步發現呢個構圖幾有趣，於是停低左一陣睇吓有冇特別野經過，點知有個老男人大肚腩食住支煙仔過馬路。
200mm iso320 f5.6 1/320
唉～一起身就搭車仆出嚟影海霧，早餐都未食，係時候要醫肚喇！自從我知道呢間野嘅存在之後，每次我經過北角，我都一定食呢間茶記。呢間茶記有個不成文規定，星期日休息... 但你話佢寸嘴又好，星期日唔休做又好，對鋪頭員工有人情味又好，人哋真係串得起，好生意，成日爆場，同埋真心好食！佢個瑞士雞髀出色到呢... 係dcfever呢度唔係三言兩語打幾隻字就可以形容得到，自己親身去試吓就知喇！佢真係好抵食，睇吓個餐牌， 配A+B+C、A+B+E、A+B+M咁多花款，今時今日仲係$4x ，咁多嘢食！仲要有埋杯嘢飲！真係抵屌到爆廠！紅豆冰加兩蚊咋大佬，抵屌！
我叫果個餐A+B+E，瑞士雞髀+吉列魚柳包+炭燒豬頸肉+餐肉炒蛋飯，加$2紅豆冰。由於太肚餓嘅關係，淨係影咗咁多～
食完野，一場嚟到諗起鬧市中有電車行走...春秧街～不過去春秧街之前，去個小便先，但茶記廁所有人，於是去咗北角體育館廁所，落嚟之後比我見到工人灑水，即刻影低！一張姐，跟住佢就冇再灑水走咗佬...
92mm iso640 f5.3 1/500
終於到達春秧街，其實構圖得一個，係電車後邊前面好多人經過，主要係睇有咩人經過同埋電車顏色，於是等... 嗰日影咗幾張認為滿意，時刻順序發佈～
呢張架電車幾靚幾特別，但d人構圖唔掂...
125mm iso1000 f5.6 1/500
呢張d演員唔掂，仲幫人好明顯咁賣廣告...
180mm iso1000 f5.6 1/400
呢張我最滿意，外國人個輪廊好正，雖然影到blur哂，但係輪廊都仲好出。又雖然都係幫呢間公司賣廣告，但係人哋外國公司全部英文字感覺上有品味得多，我願意幫佢賣廣告^.^v
190mm iso1600 f5.6 1/250
呢張有feel，前面手推車後邊電車，仲有疑似夫妻檔～
180mm iso1600 f5.6 1/500
呢張壓縮感咁最強300mm！
300mm iso1600 f5.6 1/320
睇天文台個app，日落都似收收地皮，提早散水。
朕～係大概呢半年先喜歡街拍，以前街拍我覺得好無聊，影嚟影去咪又係咁。直至唔記得拎起邊枝神奇老鏡出街試拍(大光圈)，同埋後製調色有新突破性發展，個腦好似突然間開竅，鍾意左街拍。在下街拍真係一名新手，有好多進步空間。街拍有趣之處，每次出街面對情況都唔一樣，就算同拍檔同一時間一齊影，啱出嚟個結果都會唔一樣。因為大家個觀感、構圖，嚗光鐵三角認知、了解、想影散景效果略有不同，所以唔同攝影者有唔同效果，呢個就係街拍奧妙之處！
唔講有啲人可能唔知，今日見電車路靠海嗰邊，其實就係當日從前既海平線，即係電車軌對出就係海，後尾填海(越填越出=.='')，所以電車路沿線先唔係沿海。
希望黎緊有機會或者有mood分享其他野，老鏡、新鏡頭又好，日常遇上大景出動經歷又好，或者街拍有新idea～唔知下次幾時，會遇咩大景又可以成個故仔咁呢^.^v
歡迎加ig交流！
instagram: andrewncy.images
