優點:
1) LEICA 鏡!!仲要係 28-200 mm 同埋 f/2.0 大光圈嘅鏡!啲色調用標準風格影起上嚟好自然,又唔會話好淡或者係太鮮色咁。
2) EVF。講真呢樣嘢依家變咗我必用嘅一樣嘢,因為日光下面睇唔清楚個屏幕嘅時候可以見,同埋用開 EVF 影相嘅時候會定好多,搞到我依家除咗影近嘢會用屏幕欴外,有得用佢就用佢。你可能話得 20 萬像素太 cheap,但倒不如咁諗:有得比你用又何樂而不為呢?
3) 控制方式夠方便。呢部機除咗有 Fn 制之外,仲有一個飛梭轉盤同埋鏡頭控制環,不但控作方便仲好實用,好多功能都用得到,以呢個價位嚟講真係唔話得
4) 有 Wifi 同 NFC。下載返嗰 app 即刻可以過相去手機,方便到一個點
缺點:
1) 粒電唔算太耐用,EVF 同個 mon 用嘅比例大約係 6:4,大約影 200-250 張相就會冇電,如果係用嚟去旅行影相嘅話最好帶粒後備電,因為呢部機唔支援用尿袋邊用邊充電的
2) 對焦方面有啲濕滯,有時睇落合焦咗但出到嚟居然炒咗相,同埋越遠嘅嘢合焦會比較慢,如果係慢慢影嗰隻就冇乜影響,但我自己有時會拎嚟影巴士,好想快啲合焦完之後 pan 嘅時候就同我 out-fo,呢樣嘢比較困擾
3) 開機熄機反應稍慢,有時心急想影嘢結果仲要等佢慢吞吞咁開機,結果 miss 咗影佢最好嘅時機
評價:
本身都冇諗過自己會買呢部機,但咁啱原先用緊嗰部冇啦啦電池壞咗,於是嗱嗱聲去睇邊部機可以頂住檔先。
上咗做咗吓功課發現呢部機規格都幾唔錯,最重要係有 200mm 望遠端,對於我影慣嘅幾個位都已經好夠用,再加上專門店居然會減價減成一半,即刻嗱嗱聲卜去買。買咗先知原來會送埋 16GB UHSI 卡,對於長年用緊 4GB 卡又想升級嘅我嚟講簡直係一大吸引賣點。
買得呢類機嘅人都知 ISO 肯定不盡人意,800 用到都算偷笑。呢部機可用 ISO 都落響差唔多嘅水平,80-200 可用,400-800 可用但 noise 比較明顯同埋保留到嘅細節唔多,但係重點係佢可以影 RAW(優點唔提係因為買得細機都諗住 P mode 走天下架啦)之後入電腦再執相,話唔定可以響細節同 noise 之間做一個平衡呢 :D
如果你問我值唔值得買呢部機,我會覺得值,始終佢都係有齊曝光模式嘅機,唔熟影相嘅人大可用全自動模式,玩熟咗又可以當主力 / 備用機用,不失為一部高性價比嘅機。