優點:
* ISO1600 之下完全交足功課, 就算同而家新出, 成八九千蚊嘅 model 嘅中階機比較, 一 D 都唔輸
* 一秒七張快門一樣夠用, 50D, 60D 甚至 7D 就祗係快得個一兩張都唔夠, 但係要俾多 N 咁多錢, 唔係搵食機唔駛買到咁盡啦
* 用戶設定有三個, 竟然仲多過後繼機 50D, 方便鍾意同一場合玩唔同 setting 嘅用家
* 二手價平, 新手買嚟學影相固之然抵玩; 老手買嚟做士啤機都有餘應付到各種情況需要
缺點:
* 1000 萬多 D 嘅像素, 數字上好似輸咗好多, 不過實用程度其實一樣; 除非你係 Professional 到 D 相下下影出來要晒海報
* ISO3200 係假嘅, 你當生少個仔算啦; ISO1600 以下絕對冇問題
* 得 9 點對焦, 又冇水平對焦好似 out 咗少少, 不過, 識得基本單反操作應用的話都會明白呢兩樣嘢其實都係 fancy 嘢, 實戰時有幾何用到?
* 個 color mon 就真係唔抵幫, 顯示像數真係幾差, 好多時都會俾佢呃咗, 所以睇完之後唔好即場 delete 相
* 其實 CP 值相比之下, 以上所有所謂嘅缺點經已唔係缺點
評價:
雖然到今時今日先至幫部 07 年出產嘅 40D 寫用家心得, 可能真係有 D out; 但係始終用過一輪, 對於呢部機真係有少少分享同埋感覺, 所以照樣寫低, 希望可以對於尋找平靚正二手機人仕有 D幫助同埋啟發 (笑)
小弟之前兩三年係玩開 450D 嘅; 不過因為財力同埋影相祗係一種閒時嗜好嘅關係, 所以唔想投資得太多; 所以當決定 upgrade 中階機之後就一心諗住搵部二手嘅, 40D, 50D 定係貴貴地入部 60D 好呢? (當然, 7D 同 5D, 5D2 經已 out of budget 啦)(苦笑) 終於, 問過晒 D 影友嘅意見之後, 結論係: 60D 太膠 (因為 Canon 唔想 60D 個設計同 7D overlap, 所以放棄咗沿用 40D 同 50D 嘅鎂合金機身, 變相降格); 50D 同 40D 二手價差 $2000+ 但係影出嚟嘅嘢其實所差無幾 (老實講, 兩部機雖然 chips 唔同, 但係一過 ISO1600 之後都係慘不忍睹, 像數大咗少少但係對於家用嘅影師又有咩分別? 除咗勁 chop 相同埋晒到老年咁大張海報有唔同之外...) 終於, 小弟最後都喺年頭經過 DCfever 入手咗一部二手 40D 連原廠直倒, 索價 $3500
三千幾蚊一部二手中階機 (40D), 同一部新入手四千幾蚊嘅一手初階機 (450D) 嘅分別, 經已係兩個完全唔同世界嘅事; 而且後者其實仲要係早推出過前者半年嘅, 所以部 40D 一入手之後, 第一個感覺就係 "當年買錯機" - 不過又老實講, 40D 新機價錢同 450D 根本就係唔可以比較, 但係而家大家都係買二手, 價錢所差無幾的話, 我可以肯定話俾各位想入二手機嘅新手聽, 一定要買中階機, 淨係對焦速度同埋連拍速度呢兩項, 就經已值回票價.
用開 450D 影人像, 一轉 40D 之後, 好大鄉里咁講句: 樣樣都係驚喜 (下底優點度經已每一樣講晒) 然後再喺其他攝影活動裡面刻意拎師兄弟們嘅 50D 同 60D 感受一下, 老實講, 真係分別唔大 (60D 太膠感同埋太細部, 呢樣嘢就真係自己接受唔到) 既然係咁, 我會建議各位用家如果真係要買二手機的話, 可以考慮 40D, 再喺差價度加少少錢 (可能唔駛) 配支好鏡, 影出來嘅嘢一定唔會失禮過 50D 或者 60D - 至少唔會後悔.