優點:
* 三千零買支 24-70 F2.8 恆定又有埋 Marco, 想點?
* EX 系 Sigma 鏡當之無愧, 就算開盡 F2.8 都一樣利到介手, 略收一兩級的話殺得死人
* 發色較暖, 人像首選
* SLD 鏡面塗層處理, 防眩光同埋色散控制功夫上面表現不俗 (當然唔及 APO 好, 又係錢作怪)
* 700g 鏡身雖然話重唔重, 但係仲可以接受; 總好過俾多一倍價錢買支有 HSM 但係冇咗 Marco 嘅返來而且仲要有成 100g
缺點:
* 伸縮鏡筒基本上都係一部吸塵機, 保養同埋清潔都要特別小心
* 變焦環太近機身, 同埋太緊, 操作冇咁方便同埋費力
* 走焦情況間唔中都會發生, Sigma 鏡主常見
* 冇 OS (其實另外一支有 HSM 都係一樣冇 OS 嘅)(唔係點會賣得咁平?) 不過反正都係大光圈, 可以利用快門又或者推高 ISO 補教
* 雖然未遇見其他 Sigma 鏡主甩皮/發白嘅情況 (支鏡我都幾常用, 人像主力) 不過鏡身物料癡塵真係幾煩, 次次用完都要掃餐死
* 82mm Filter 相對鏡頭價值來講比較貴, 而且亦都唔係度度有得買; 但係唔買又唔得
* 冇鏡筒 Lock 制, 一垂底鏡身就會自動成支跌晒出嚟
評價:
雖然係業餘 (嗜好) 影師, 但係始終日常都係以人像為主力, 所以點都要有一支 24-70 F2.8 鏡頭看門口; 作為 Canon 用家, 當然知道最好就梗係原廠支 24-70 F2.8L IS USM 啦, 但係喺價錢同佢個名個長度成正比嘅情況之下, 又唔係搵食, 對於我呢個 budget buyer 嚟講真係買唔落手; 退而求其次, 喺 Tamron 支 A09 (28-75 F2.8) 同埋 Sigma 呢支之間作出比較 (有 HSM 嗰支唔講啦, 俾多 $3000 買得個 HSM 但係冇咗 Marco, 點解唔俾埋嗰幾千蚊買埋支 Canon L 鏡)(層疊式思想陷阱)(苦笑)
龍仔支 A09 其實同 Sigma 呢支鏡頭價錢相若, 但係 28-75 呢個 range 真係有少少頂心頂肺, 差少少, 唔夠 wide 就真係唔夠 wide, 但係鏡身比 Sigma 支明顯地輕一截係事實, 雖然同 Sigma 一樣鏡片都有塗層處理, 但係明顯唔夠利, 色散控制亦都唔夠 Sigma 好.
數完龍仔嘅不是, 主力數番 Sigma 呢支鏡啦:
* 走焦, 迷焦, 差唔多每個 Sigma 鏡主都會面對過嘅問題, 我都唔例外, 支鏡買咗兩年用足兩年, 習慣咗佢個 5% 平均失敗率的話, 其實都唔算得係咩 (Critical 場景咪影多兩三張蜻飛咯)
* 窩打聲好好聽亦都好大聲, 可以大聲到你覺得嘈嗰度 (苦笑) 想要靜 D 都得, 俾多一倍價錢買支 HSM 咯又 (Sigma 嘅 HSM 祗係靜, 唔代表真係快好多, 至少慢過 Canon 嘅 USM, 所以個人覺得唔值得俾多一倍價錢)
* 鏡身重過龍仔, 可以話係缺點, 但係 82mm 鏡筒拎起上來外型夠 pro, 反而覺得機鏡重量平衡方面會仲好
* 鏡筒變焦伸縮距離真係有 D 叫人摸不著頭腦 (24mm 最長, 70mm 最短)(可能手頭上其他鏡頭都唔係咁樣設計) 如果成日用 wide angle 影嘢的話, 入塵機會率仲大
當然, 數完咁多之後, 做人最現實都係睇錢份上 (除非支鏡頭愛嚟搵食用就另計) 所以相信如果我話 Sigma 呢支鏡頭, 係云云 24-70 F2.8 裡面 CP 值最高嘅一支鏡頭, 相信唔會有咩人反對 (支鏡頭亦都唔係冇優點, 下面至少都寫到幾個出來)(苦笑): 一分錢, 兩分貨, 想買支又平又靚嘅人像鏡頭的話, Sigma 呢支應該都係不二之選啦 (笑)