優點:
(1) 輕- 輕量化係大趨勢, 個人就好Buy, 配D750重量剛剛好, 手持用腕帶都唔覺累
(2) 銳- 光圈全開畫質可收貨, 但最常用都係f2.8~4個段真係好sharp,
(3) 廣- 28mm 出街影小朋友玩道具非常合適, 街拍一流
(4) 平- 二手二千幾蚊, 又金圈又N膜真係抵用到震, 我發現二手區放緊既呢支鏡都好高質, 因為我當係鏡頭蓋, 冇諗住錫住用, 有興趣師兄可考慮買支二手玩下
缺點:
(1) 手感 - 唔係講緊金屬鏡身輕量化呢D矛盾野, 主要係對焦環較輕, 加上全時手動對焦, 有時唔小心錯手攪到脫焦.
(2) 色散 - 評測話冇ED鏡色散嚴重, 反正我不太care, 加上收下光圈更加唔覺, 否則加兩塊ED要加兩千, 你接受嗎? 或者豁出去買1.4E會幫到手
(3) 變形 - 唔算好嚴重總之影人影景都唔覺, 反正又唔係日日對住d紙皮石影, 加多幾塊非球面是可解決的, 麻煩俾多幾千買大三元
評價:
有時好佩服d人D800+大三元揹個大背包去公園影相, 見到佢地全身濕哂眼光呆滯, 意志力真係驚人. 而加D750+28.8+50.8+70200.4, 輕裝上陣買個鏡頭capture夾住條PD silde, 一機三鏡直情唔洗帶相機袋, 焦段也算齊章(打雀除外), 爽YY程度真係正到核爆. 另外, 用28mm除了街snap外, 也經常用於室內照, 特別係婚宴/公司食飯影大圍相, 大光圈真係幫到手, 收少少光圈已經可以用, sharp到連鼻毛都睇到, 而且影單頭個時立體感好好, 變焦鏡真係要行埋一邊. 28mm構圖唔會好似50mm 85mm咁單調, 有時小朋友和背景既結合較好, 唔會一味得個化, 景深完全冇details. 總結, 消費者總是期望1蚊當10蚊咁洗, 又要金屬鏡身+ED+N膜+VR+9片光圈葉+非球面愈多愈好, 但又要求3百幾gram+幾千蚊貨仔, 既然欣賞它的優點, 何苦強加一些缺點, 做人咁矛盾會好辛苦的.