缺點:
1.索價18k,但光圈細,又唔係恆定光圈,如閣下只求影到但對成像冇乜要求,心理上會覺得幾貴
2.又粗又大碌,拎出嚟比人眼金金望住你(唔知算優點定缺點)
3.nikon鏡頭啲制(A/M, VR開關等等)設計在鏡頭左邊,我係用斜孭式相機帶,當部機孭住在右手邊腰間,側邊啲制經常磨到條褲而改變設定,唔知其他師兄有冇試過
評價:
我係D7100用家,想買一支300或以上的鏡影下生態,在我考慮之列的分別有28-300 f3.5-5.6, DX 18-300 f3.5-5.6, 小黑六+TC20E, Sigma 50-500 f4.5-6.3,試過前面兩支天涯鏡,覺得300mm好似唔係好夠Tele,再睇過評論講兩支天涯鏡都唔係好足焦(實際得270mm),再加上成像真係過唔到自己要求,所以冇買
至於小黑六就唔駛多講,鏡皇質素絕對不用懷疑,但問題係加個TC20E後,成像即刻跌volt同支天涯鏡差唔多,而最大光圈又得翻f5.6,兩樣嘢加埋價錢變得貴過呢支鏡,所以不再考慮
最初其實最想買的就係Sigma 50-500 f4.5-6.3,一來價錢平一半(9k),二來我本身有支DX 17-55 f2.8,所以焦距最fit,兩支加埋完全cover晒17-500,但話晒接近成萬蚊買支鏡,點都要上去showroom試下,一試就即刻發現問題,上到去sigma側魚涌showroom,一拎支鏡上手影,支鏡真係重到冇朋友(2000g),加埋部機,直倒的重量,影咗半個鐘真係膊頭痛兼手軟,同埋唔好睇少差一級光圈(500mm最大得f6.3)原來真係差好遠,由於showroom室內光線唔係咁好,就算開盡光圈開晒防震加埋石膏手,在500mm端影十張只得兩,三張中,除非將ISO推到上3000千以上,再者,sigma支鏡用95mm filter,我出去問過普通的protecter(唔計淘寶貨式),一塊都要成九百蚊,如果要配多塊CPL和ND,一來難搵,二來我諗可能隨時要三,四千銀,所以最後還是打消念頭
講返支主角,用咗一個星期,試過影人像,動物,風景,小朋友運動會,可能支鏡有一塊super ED,納米塗層和四級防震,成像顏色控制得非常出色,影出嚟效果個人認為拍得住小黑,色銳散景靚,大一級光圈同nikon出名的防震技術真係唔好睇少,影十張相有九張中,需然都重(1600g),但可能因為鏡身冇sigma咁長,影咗成日都唔覺太累和手持的平衡感都比較好,另外用77mm filter(同我支 DX 17-55一樣),剩係買filter都慳唔少錢,最後還有後著,就係呢支鏡就算再加個TC14E(雖然成像一定有影響),可以變成112-560mm,而最大光圈都唔細過f8,重可以用到auto focus,所以在深思熟慮下,最後都係比貴少少選擇咗呢支,到現在都沒有後悔感覺