優點:
1.大容量16gb+1tb,可以用到4至6年先滿。
2.多顏色揀,我買嗰陣時仲有額外限定三隻特別包揀。官方主打色為素皮青綠。不過自己覺得素皮黑會襟耐睇啲,所以最尾都揀咗素皮黑。
3. 2K華星微曲mon,個人覺得比起iPhone12嗰2k mon更加光同細緻。同埋13 ultra都係目前我用過以來第一部可以喺大太陽底下清晰見到電話螢幕內容嘅電話。微曲mon喺睇片方面會比平mon更加有感覺。電話mon最高解像度可以去到4k 2160p。
4.有90w快叉,比起iphone12嘅20w快叉快好多。13ultra叉40分鐘就可以帶出門口用。
5.有120herz螢幕刷新率,比起舊機嘅60herz順滑好幾倍。
6.Leica調教過嘅四個鏡頭影相表現唔錯,就算係影相初學者都可以直接影到唔錯嘅相。不過可惜光圈淨係得f1.9同4.0,比起華為手機鏡頭光圈選擇方面少,而且13ultra每次預設都係畀你f1.9用,建議每次先檢查光圈並手動調教為f4.0以獲得最佳攝影表現。錄影方面最高有8K。有番專業模式返嚟畀自己調教舒服過比起蘋果強制要你用佢嗰套攝影方式去影相。不建議前置及後置鏡頭都使用美顏功能,個人覺得不真實且效果出來浮誇。
個人認為在夜晚表現,夜景模式f1.9光圈直出實際拍攝效果不如專業模式在多方面調教並用f4.0光圈拍攝出來的效果更好。
7.有nfc,可以感應到八達通
8.有無線叉電,最快可以去到50w無線叉電。
9.Snapdragon 8gen2為2023年度Android電話旗艦cpu性能之榜首,日常操作使用絕對應付得到。打機都唔會有特別明顯嘅過熱,如果係要玩原神嗰類嘅大型遊戲嘅話,建議買個電話散熱背夾去幫助電話發揮頂峰性能。
10. 5000mah大電池,一日唔多用嘅話可以去到得返40%。
11. 13ultra可用Google one為電話作備份,Google one訂閱費用比起iCloud訂閱費用實惠不少,Google one亦可以為多部android設備同時備份,以方便管理及轉移資料。這點的確比起iCloud在使用性、價格及方便性上更勝一籌。
12.指紋解鎖速度非常快捷,能夠輕鬆方便登入使用電話。亦可以錄入多個指紋以方便使用。
13.有ip68防水防塵。
14.支援並能順利使用香港5G及4G+。
15.鍵盤打字手感合格,但希望後續系統更新能增強震動回饋。
16. Miui系統設計豐富,對Android電話或iphone使用者十分友善,甚至有相關教學教導使用者如何使用電話的手勢操作。
17.電話的背景、字體及風格方面可從內置個體主體App選擇,可玩性非常高。
18.相較三星、Sony、蘋果、華為等一眾旗艦手機的價格,13ultra能帶給用戶一個價格合宜且綜合表現不錯兼攝影表現方面優秀的選擇。好過焗住要揀行貨,仲要多數只能蘋果或三星方面二選一。
19. 電話喇叭聲音夠大,靚聲 。有得開Dolby Atmos 全景聲。可惜冇咗以往小米旗艦機一直都有嘅Harman Kardon認證。
20. 有人臉識別功能。
21.type c插口支援usb3.2速度,過資料速度比起iPhone12嘅lightning usb 2.0插口快好多。
缺點:
1.機身重,帶埋殼已經有267gram。如果想入手嘅話,建議去普通電話舖搵部二手機試玩先,因為香港小米之家已經唔再賣呢部嘅行貨版。
2. 13ultra頂配版香港冇得賣,行貨版仲要係特供配置12gb+512gb,而且售價居然為港幣8999。頂配版在中國居然比香港行貨便宜大約一千元港幣,因此當然入手水貨頂配版在價格上是較為明智的選擇。
3. 由於水貨沒有香港保養,若要享受官方維修服務,便要拿到深圳小米之家或小米維修中心。不過勝在維修服務價格一定較旺角香港小米維修中心便宜,並能即日拿回電話。
4. 雖然水貨版出廠自帶GMS框架,但係不能夠直接透過Google One進行還原備份,除非使用小米換機程式。
5. 中國版miui系統不如國際版miui系統簡潔方便流暢。
6. Miui系統不如ios系統流暢,程式方面有略微lag的感覺。
7.好奇怪,係唔知點解唯獨miui系統係有廣告功能。要check清楚系統同原廠內置程式設定入面有冇廣告選項,一定要熄咗佢。
8. 因不同系統,iCloud資料不能轉入新電話, Whatsapp資料從ios轉android都需要透過電腦程式轉移。其他程式亦有可能會因不能轉移而導致資料喪失。
9.本來Android相簿有為照片做自動分類,但係因為iPhone相簿係唔會咁樣做,變相過曬啲相去新電話度又要重新再執過,好麻煩。
10.呢部電話一定要從網購平台購買電話殼,去咗好多地方問過都冇電話殼賣。
不過就有得現場貼mon貼。本人強烈建議要貼鏡頭貼保護鏡頭,避免碰撞割花鏡頭玻璃。
11.冇microsd卡位同3.5mm headphone jack。
評價:
本人舊機為iPhone12 ,因舊機跌壞鏡頭無法使用及因過保而面臨高昂且完全不合理官方售後費用的關係而轉用小米13ultra的。
當時是想尋求綜合表現接近大廠Android旗艦電話水平,但同時擁有價格合宜且大容量儲存的旗艦電話。於是在比較不同品牌過後,最終選擇了小米13ultra。
由於得知香港小米已經不再售賣行貨版本的小米13ultra,於是本人便從網購平台獲得中國水貨版本,但因價格原因並沒有入手其官方攝影套裝。
由iPhone轉android其實並非是一件難事,小米miui系統其實與ios系統在操作上及ui設計上有很多大同小異的地方。基本上只要先前有稍微接觸過小米電話,便很容易上手使用。
不過本人強烈建議拿到水貨新機後,便第一時間解鎖Bootloader鎖進行刷Rom。因為中國版本系統所佔用容量較國際版本系統多大約5GB,兼且經常有一些奇怪的中國新聞軟件通知。就算原機出廠帶有GMS框架服務,但是本人透過刷機軟件發現該框架並非是完整google服務。因此本人還是建議如果電話的主要使用地方是香港,還是刷Rom會對使用者自身較為方便合適。
跟機配送中國版兩腳90w快叉火牛、type c快叉線同黑色原廠手機保護殼。不過原廠殼冇包角位驚跌機容易爆mon,後尾買咗個防撞殼先解決到冇包角位問題。嗰時小米做緊優惠活動,送咗個官方無線耳機及大陸地區電話流量卡,我用咗優惠價格順便買咗個官方50w無線立座式充電器,可謂十分貼心關照並明白用戶真實需求,而並非像香港某百X匯或某X澤等商家向用戶贈送毫無用處的贈送品或讓客戶簽署長年的本地通話plan以招來客戶光顧。
電話用起上嚟覺得滿意,係呢13日使用上感想好多,於是我決定寫呢篇心得俾各位參考,亦都向各位推薦呢部手機。