Honor 90 Lite

平: 在同級嘅電話之中價錢算係最平，中國移動出機1399，如果買大陸版嘅再平多200幾蚊港紙，大陸版叫Honor 90 青春版，但係榮耀賬戶要用大陸電話號碼才能登錄，所以都係買香港版算數，係都買新機唔好貪嗰少少嘢費事保養有問題。

靚: 平價機有咁樣靚熒幕絕對超值。平面熒幕，直邊設計，純粹個人鍾意，本人不喜歡曲面熒幕。唔明點解啲大陸嘅旗艦機全部都係曲面熒幕，Apple, SONY一直都冇出曲面熒幕的機，三叔而家都由曲面熒幕轉返做平面熒幕，真係唔知係大陸設計手機啲人有問題定係啲熒幕生產商有問題。

正: Honor 90 Lite 用的SOC係低價嘢，手機用起嚟整體暢順，冇明顯嘅疾機，超出本人期望。

有FM收音機功能，部機凈係得個type C插，冇3.5mm插，以為冇這個功能，但係有收音機app，原來要插入type C 耳筒才可接收FM收音，咁就冇3.5mm插都冇所謂。

電量持久，在同價位機之中這部機電池容量不是最大的，依照本人使用習慣，差不多兩日才充一次電都可以。

上網睇這部機的評測，影相部份極少提及，就知乜嘢事，果然這是一部日光機，這個價位就冇投訴。但係影完相長按相中文字可以highlight複製功能閹割咗, Honor 曲面熒幕的型號全部有這個功能。

冇原生可以按資料夾播放音樂的音樂播放器app，估計係google的商業目的,現在大部份android機都係冇，用開華為機所以不習慣，之後在Honor應用市場搵到第三方播放器app解決問題。

刪除了超級省電功能，用開華為有這個功能，現在是兩個品牌，刪除了都冇嘢好講，唔好以為華為同埋榮耀宜家啲嘢仲係可以互通，除咗檔案分享功能之外，就算係換機過資料app，都唔係以前華為同榮耀一樣可以百分百過得曬，上網查過，在2024年1月已經結束咗互通。

買這部機是用作用副機的，主要是工作用機及養大陸電話號碼，之前的副機是一部華為Mate10，近排連返大陸放wifi都用唔到，諗住試下毒買部平價5G機，功能正常就算數冇乜要求，就在車輪轉600元買咗部全新中興ZTE Blade A73 5G，疾機同反應慢就預咗喇，用咗一個月，熒幕觸控有問題，同埋系統不穩定，買火車票都自動重新開機幾次，馬上放售，中興低階機真係勁。之後諗住再次試毒，買中興ZTE Nubia neo 5G，中興係第一次用，操作唔係幾慣，驚又瀨多次嘢，都係買第啲牌子。試過小米, VIVO同OPPO, 揀咗Honor 90 lite，操作似華為，因主力機用開華為P40 Pro，免除好多學習成本。

講少少華爲冇GMS 的感想，之前識好多人用開華為，華為冇咗GMS之後就唔再用華為，佢哋認為華為冇咗GMS之後喺香港就等於廢機，好似我哩啲鍾意試毒嘅人，就要買部華為機試下，對大陸機有偏見嘅人另計。在香港手機有GMS固然方便，但GMS係有替代品，衹要你唔係Google嘅重度使用者就可以，我有個朋友就係Google重度使用者，一攞電話出嚟就要ok google，咁就真心不建議用華為，呢個朋友而家由華爲轉用咗榮耀。衹要裝類似Gspace, Lighthouse的app 就可以有GMS九成幾功力，廣東話語音輸入法可以裝訊飛，要睇youtube可以裝ReVanced 乜乜 等等，網上大把教學，本人不建議畀錢人裝GMS到華為機，裝完都唔係一勞永逸，有錢都唔係咁用。