話說筆者早幾年曾經探過路,由於知道路程頗長難行,所以唔帶腳架,減輕負重,增加機動性。第一次去帶咗部菲林機FM2同埋一支輕巧鏡頭28-70mm f3.5-4.5。不過嗰陣時冇乜預到時間,去到嗰度又潮漲,時間又比較晏,冇乜陽光,故筆者一直飲恨想再嚟多次重遊舊地!
是日出動鏡頭~ 16-35mm f4 vr 影大景、沉積岩、日落手持慢快門(防震,減輕負重冇帶腳架)專用。28-70mm f3.5-4. 5 以作後備zoom多過35mm用。H&Y full hd mrc spro1 slim cpl加持,用嚟提升藍天、海水清澈見底質素!
23 Feb 2020 嗰日係好時機,因為晏晝三點先開始潮漲!
同埋嗰朝朝早我先知道有個好消息,原來275R原本係新娘潭做總站,嗰日係第一日去烏蛟騰做總站!原本諗住由新娘潭行去烏蛟騰,而家又可以慳返啲腳力!
到烏蛟騰總站,梗係打卡啦!
正式出發!開頭冇咩影,直至開始上斜,吊燈籠做背景,藍天白雲,條路又幾有feel,輪流交換叫隊友幫我自拍一下先!
19mm iso64 f10 1/80
啱啱上完大斜路,稍為見開陽位置,藍天白雲咁好天打卡留念!
35mm iso64 f9 1/80
繼續前進!
26mm iso64 f10 1/60
用返第一次去紅石門枝鏡先~28-70mm。加左CPL,見到海上小島層次。
70mm iso64 f8 1/100
沿途打卡完畢,真正靚相,宜家先正式開始!
天空之鏡!反晒光小水塘配襯魚鱗雲!一絕!
16mm iso64 f13 1/80
全藍天mode開啟,CPL功不可沒!可能你哋會覺得藍得有啲怪;有啲過分,不過唔知你哋搭緊飛機留意天頂?喺高空嘅時候,情況同呢張相一樣,原因高空空氣質素好 ,冇咁多塵;煙霞反射光線。加左cpl就係好似刪除光打落煙霞咁樣;還原天空最真實一面紅白色配搭加埋充足陽光。白色應該係入侵斷層岩漿,岩脈入侵。即係紅色沉積岩已經形成,中間已成斷層期間,有新岩漿入侵呢啲斷層,再慢慢結晶(石英脈),因此侵入岩晶粒粗大、顏色同品種都唔同。如果冇記錯嘅話xD
18mm iso64 f10 1/100
睇吓啲水幾清幾靚,CPL功不可沒!
19mm iso64 f7.1 1/80
大特寫!呢度沉積岩為主,主要由砂岩同埋粉砂岩形成,大概1億年前恐龍繁盛時代形成。沉積岩硬度相對火成岩軟身,故抗侵蝕力較弱。
16mm iso64 f8 1/50
紅石門招牌位置...小水壩~
16mm iso64 f10 1/80
橫過水壩後,眼見一層層岩石插入水底,加埋CPL呢個構圖係可造之才。雖然唔係咁靚,不過值得打卡留念~
16mm iso64 f10 1/50
係我影緊相期間,隊友後追趕到,佢突然有feel,幫我為紅石門合照影咗張相~ Thanks!
24mm iso64 f11 1/30
繼續前進,影嗰陣時有細心諗過,自覺靚仔構圖!基本上係½構圖,地景同天各佔一半,紅色石為主題,左邊係海,中間大部份係紅石,右邊係輕微山丘,中景綠色小山陪襯,後景藍天白雲。
16mm iso64 f10 1/50
哇!呢個舊沉積岩好突出!近海面所受到侵蝕相對比較少,一定要專心構圖,為佢打卡留低最好一面!紅綠藍!
16mm iso64 f9 1/50
原來行前少少,有個小沙灘。一場嚟到,近shoot影下海水沖入嚟先!
16mm iso320 f8 1/400
魚鱗雲又再次逐漸形成,見到咁靚雲,又突然間有feel,自拍美腿 + 藍天白雲xD 眼前有咁靚景,真係一種享受!貼合主題... 用心看HongKong!
18mm iso64 f11 1/100
離開了,因為路途都有啲難行,所以我哋提早回程,避免入黑,減低意外風險。當上山途中,有舊大石可以休息時候,抬頭望天亦係一種享受!
16mm iso64 f11 1/80
終於上返條主路,時間就到日落時分,以我哋習慣/慣性,當然要影埋日落最美個刻先走收工啦!船灣淡水湖... 全相!火燒雲唔算突出,都算有少少顏色。雖然唔係最靚位置,不過都算影到整個湖面!陪襯魚鱗雲,簡直係一種視覺享受!16mm iso64 f5.6 1/10
賽後報告:
今次又係好好彩,星期日有巴士直到烏蛟騰,又咁啱第一日總站改為烏蛟騰,又咁啱下午三點先開始潮漲,又咁岩陽光充沛,又咁啱藍天白雲,又咁啱形成魚鱗雲!好多嘅咁啱,造就一個完美、充實旅程!視為一個旅程係我每次出動目標、宗旨、習慣,整個旅程又係好滿足!雖然影船灣淡水湖全相日落唔係最佳位置,不過以整個行程黎睇就好圓滿,日落算係執返個尾彩xD 如果出動只影一兩張日落相的話,一定滿足唔到我同隊友影相嗰種衝動同埋慾望,同埋依家咁時勢又哂多一個口罩xDDDDD 今次行程我比100分,因為路程唔係一般咁易行,去到紅石門嗰時,有種苦盡甘來感覺!終於到喇!紅石門我嚟喇!1億年前火紅色沉積岩,我黎影你地喇!
希望黎緊有機會或者有mood分享其他野,老鏡、新鏡頭又好,日常遇上大景出動經歷又好~唔知下次幾時,會遇咩大景又可以成個故仔咁呢^.^v
歡迎加ig交流!
instagram: andrewncy.images
多謝收看!多謝睇我分享!
完