搭車去旅行－寮國與世隔絕篇(上)
(Day 5)西湘版納—>(寮國)琅橋
不知是否寮國太少香港人去，只得內地及台灣人去，D譯名以普通話譯音為主，有D又譯得怪怪的⋯ 你知內地D譯名不嬲都怪怪地，如”貝克漢母” 有無人知係乜？所以我膽敢係這裡用貼近當地既語言去譯這些地名，務求想去當地既朋友問路時都令對方聽得明白! 如早前講過今日要坐巴士去既地方叫”琅勃拉邦” 我會叫”琅巴班” Leung Prabang
巴士0735開出，只係得十個乘客； 開車前我同司機講我想去"琅橋" Nong Khiaw，問他會路經嘛？ 原來不會路經，只經地圖顯示最近既路口，佢提議我到”琅巴班”再轉車去，咁無理由要走回頭路嘛，而且我現在行程就係一路向南玩，最大目的係琅橋沿湄公河支流坐船南下去Leung Prabang，所以如落到去就一定唔返轉頭了… 於是我叫司機係果個不知名路口掉低我，再截順風車去啦！有個好心乘客話，個路口好似有間中國人開既超簡陋飯店，提議我住一晚，第二朝再截車去喎～
巴士一路往南走，一直大霧閉天，怪不得當年諸葛亮打南蠻既時候，士兵因瘴氣問題傷病嚴重啦！ 咦！ 我依家咪正正當年諸葛亮打南蠻既時份？ 故五月渡瀘，深入不毛…
原日太陽出來後就煙消雲散喎！ 1100到達磨憨口岸，司機先去磨憨車站停一停，一落車好似比人蟻嬲蜜糖咁，又換錢又買電話卡，最後兩樣都有做，滙率唔錯，換了¥300人仔及$100美金；而電話卡更吸引，佢話有數據有500mb容量喎！不過唔知用唔用到⋯ 開價¥50，還價¥42成交！$100美金換$780000-Kip
之後就到磨憨關口，中國離境後就到寮國，寮國果面叫磨丁關口，一入建築物已有個職員截住叫捐什麼$2美金既捐款，車上既職員就打眼色叫我繼續進行，可憐既同車幾名乘客被"拷窄"了… 到了入境，這裡規矩每人也夾$20000-Kip($20-HKD)落護照，我看見有內地遊客唔知規矩，關員光明正大主動開口攞架！ 唔比應該百般留難呱… 仲有呢度可以辦落地簽證架！
一入寮國境內，好似返回原始咁呀！沿途一片荒蕪，只見盡是森林，偶爾見到村莊，不過是茅屋、木屋，而九曲十三彎既山路，令到車程加陪延長，及後司機車我們到一間簡陋餐廳，$25000-KIP或¥20，餸自己揀，白飯任裝～
1430去到猛晒巴士站稍作停留（內地叫猛賽既地方），係一個頗大既城鎮，地圖上顯示係個公路十字路口，見站內有車去唔同既地方，趁機當然問吓有無車去琅橋啦！ 不過要明早0900先有，需4個小時… 咁樣其實好穩陣，不過我愛冒險，照原定計劃吧！而車上有個乘客，應該係當地有生意，同我起碼講超過十次話琅橋無野玩架，勸我直到Leung Prabang… 呢D人只懂享受，又點會明白一個旅遊者既思想吖！後來知道內地人叫琅橋做琅開，"開"同"橋"完全兩個音，都唔明點譯既!
去到叫百蒙既地方跳車，即早前講既分岔路，諗住截順風車，截得十架八都唔啱路時，竟遇到架白牌，靜靜雞問士多好好人既一家人幾錢，問定費事比人劏，但係溝通唔到就比D錢佢抽，原來$25000-KIP($25-HKD)，上車前就二話不說比左錢，費事比人呃！車上有名乘客應該做狗肉生意，有4頭狗係車尾，用鐵鏈鎖住，神情驚恐，落車時攪到司機仲幫手清理臭賓賓既糞便Tim! 係寮國做狗狗真係好慘... 不過以我所見又有好多人樣狗喎！ 點解呢？
1945到達琅橋，計計吓由百蒙坐來既車程差不多兩個鐘呀！最後一小時風景最美，沿河流旁行駛， 問清楚琅橋讀音係讀"Long kyo"即Tokyo 無左個東呀！落車後行左約十步搵到間簡陋不愖既住宿，見天已黑齊就入住啦！$40000（$40-HKD) 唔記得講價Tim... 放低行李即時搵野食，行到中心區域，見有旅行社，旅店，好多外國遊客，拿！ 車上既中國遊客就唔識玩啦，淨係識去Leung Prabang！ 之後搵到間好靚既餐廳，我諗今晚住得差啫，都要食好D既！見有背包客入後園，知道原來呢間餐廳都有住宿既，係小屋有熱水淋浴架～ $80000-KIP($80-HKD) 聽晚考慮吓先～
(Day 6) 寮國琅橋
今朝先發現原來寮國慢一個鐘既！ 可能尋晚早瞓，7點鐘醒左，係簡陋房間都算熟睡。同屋主order左早餐後，就行落河邊欣賞美景，發現碼頭原來就係呢度，一間草屋就係office，有晒時間表，全部都1100開出。其間遇到一個法國人，見我部相機即時捉住我吹水，仲邀我一齊去猛曖Tim ! 雖然我都會去猛曖，但我呢d愛獨行既梗係婉拒啦～ 返到民宿時已為我準備好早餐，我叫了奄列同飯，嘩！飯既份量好多呀！ D飯係糯米飯，一定好飽！
尋晚去食飯時見有獨立屋住，價錢也合理，於是先換住宿，$70000-KIP（$70-HKD)，係一間傳統草屋，有露台望正樹林河景，我覺得呢個價錢簡直超值呀！
放低行李就開始今日活動，就係踩單車遊覽勒！ $20000-KIP/per day（$20-HKD) 1800前還車，但架車質素太差啦，踩極都好似唔係點去咁... 踩了半個鐘去到一個出名既山洞，要比買路錢$5000-KIP($5-HKD)，到山洞前必澗水而行，攪到其中一隻鞋濕晒… 去到山洞口遇到從後趕上，今朝見過既法國人及他女友，還有三個當地小孩開路Tim ~ 法國人話佢都租左車，但係電單車，只需$80000-KIP($80-KIP) per day，咦！ 又真係好抵喎！ 山洞內特別，尤其當漆黑一片時，轉過彎就又光線打落洞內，重見光明！
返出收買路錢既地方，中午時分，烈日當空，有40°c 唔出發住啦，我怕會死！於是好似當地人咁，係個竹柵內躺下休息，涼風吹來又幾舒服喎～ 仲瞓著Tim~ 終於明白搭車沿途所見當地人點解咁鍾意咁樣瞓，因為天氣太熱什麼都唔想做呀！ 一hea就hea左差不多兩個鐘，其間有6-7個遊客入內，大部份是法國人，而當地人也有十多人，有D也有收錢噃！ 無聊看看登記名冊，以歐美遊客為主，法國人最多，竟然國內也不少遊客，全是自遊行過黎，可想而知內地人已喜歡尋找隱世景點了，香港人無乜個性，只去熱門地點，所以名冊內香港人一個也搵唔到！
等到1400時，終於等到有一點雲擋住太陽，於是就離開舒適既地方； 騎左一陣單車舊雲又飄走了... 真的太熱，路過一間當地簡陋餐廳食午餐先，即時買飲品同時見個女仔攞住杯冰水，我當堂好似雙眼發光咁，也要多一杯冰； 枝凍既檸茶，再加落杯冰度飲，係40°c高溫下真係涼透心呀！簡直是享受～ 午餐係一碗湯雜菜肉大雜燴，唔錯！ 與店員傾談後佢指指後山，話風景好靚，仲開手機比左張相我睇，係咪絕世美景又未至於，但只需兩小時就可登頂不禁令我心動！望望隻錶1430，還來得及，於是即時返回還車，再行山！
上山前當然又要買路錢啦！$20000-KIP（$20-HKD) 於是一鼓作氣登山，上山前路牌寫1小時30分就可登頂，但我只用了半小時就行左2/3都達第二個，即最後一個check point，真係咁快！ ？指示牌講一，二兩個check point也需時45分鐘噃… 近40°c烈日當空行山真係對體能既挑戰，況且我之前已踩了單車；其實開頭行了十多分鐘已飽覽小鎮全景了，當時真想放棄，本人意志力就係最薄弱一環，我很少跑步，也很少見我係旅途上行山…
當過了第二個check point後覺得好辛苦，雙腳好似唔聽使咁，也有輕微頭暈跡象... 大獲! 係咪中暑！？ 即時飲多D水同照頭淋先！ 休息一陣再出發，因為太多蚊! 去到差不多頂部都係見唔倒瞭望台，條路好似行去後山咁，有點猶豫行姑且行多一段之際，到啦！終於到啦！我用左1小時15分鐘咋!!! 辛苦換來既美景特別有滿足感！ 這裡可望到琅橋，也可望到另一面小鎮~ 難得見到既美景，當然享受一番啦！ 拍了照片後，見陽光高掛仍然猛烈，心諗這個時候應該無人上來吧（因為下面寫1600close)於是瞓係度曬太陽，set定鬧鐘係瞭望台，感受山頂既涼風瞓番一陣先～
半小時後有人聲，竟也有遊人到，原來係一個正在讀year 1既新加坡青年”柱銘”但唔係姓李! 於是在瞭望台傾談一陣得知，這個旅程是他第一次出走咋! 並傾開兩地既狀況，原來新加坡人大都埋首工作，無乜時間去旅行，唔怪之我去旅行極少見到新加坡人啦! 於是欣賞多一陣美景後就結伴落山了～
落到山先係收買路錢既地方發現，呢個山頭原來佈滿炸彈地雷，叫我地不要離開小徑呀！ 你知有時山路小徑會消失要尋找的，回想剛才真係唔識死，打個噤寒…
