新聞互動
(Day 7)琅橋 —> 猛曖
早上食完早餐就起程,坐1100既船前往較上游既猛曖Muang Ngoi。 搭船時撞見尋日既法國朋友,需然曾經婉拒結伴去猛暖,但旅途上遇到遊客既路徑通常都大致相同,尤其D咁細小村落,遇見機率可以話9成9,不得已又坐埋一條船,哈哈~ 法國朋友叫Juilen,他女友係加拿大人住蒙特里爾叫Marie。
狹窄而長既船身坐滿乘客,沿九曲十三彎既河流逆流而上,有時平靜如鏡,有時收窄河道凝成急流,一小時既船程才到猛曖,睇黎尋日登山見到好近既並唔係猛曖噃~ 猛曖無陸路直達,必須坐船,睇黎猛曖係一個與世隔絕既小村噃~ 落船時澗水而行,即時換拖鞋先~
一落船就被兜住宿了,見Juilen&Marie及另一個西方女遊客被一個外國人兜住宿,而我就刻意離開隨另一個民宿老闆去睇睇,佢既住宿算唔錯,又便宜$30000Kip($30-HKD),但睇完再想行多幾間,之後又去到法國人Juilen既住宿,望正河景好靚呀! 睇黎都係殊途同歸啦⋯ 哈哈~ 而頭先船上另一個女子雖然持西班牙護照,但就唔認係西班牙人,因為佢住既地方係北部講比我都唔知既地方,咁我即時get到,問係咪類似“加泰隆尼亞”,佢話係,仲好羨慕我有自己地方既護照。而住宿老闆係瑞典人,話旅行時愛上呢個地方就經營呢個住宿喎! 咦! 打呢篇遊記時我都正計劃梗噃~
由於中午天氣太過炎熱了,要休息一吓,並約定晏少少才一齊去山洞; 我於是去河邊曬太陽游水,好想游過對岸,望落距離不太遠,約一百米,但游了出去好幾次都係折返,始終害怕河中央有暗湧旋窩,之後Juilen都一齊來浸水,都叫佢陪我一齊游過去壯壯膽,佢又話早前整傷膊頭怕危險⋯ 欺山莫欺水,放棄吧! 不過浸完水,成身涼晒~
約下午4時,避開最炎熱既中午,但其實都好鬼熱⋯ 就同Juilen&Marie又探險山洞啦~ 先去小鎮,老闆既大本營食個Tea先出發; 我同Marie都輕裝上陣,除了Juilen! 我留意左Juilen好耐,自第一眼見佢,去邊都著牛仔褲,連依家連去探險都著,佢就話喜愛牛仔褲喎! 我就笑佢法國人真係fashion,我係咁熱既天氣就真係頂唔順勒! 諗起D熱氣由褲管湧返上黎嗰吓都怕⋯ 我一到熱天,基本只著短褲,如迫不得已要著都係著行山褲。
其間同Marie傾計,原來佢都去過唔少地方,中南美,歐洲等,而亞洲係第一次,佢仲講到明係單身,Juilen都係這個旅程係泰國認識,因為佢話單身女仔去旅行經常會遇麻煩,如中南美經常比人瞭,意大利更明目張膽,伊斯蘭世界就當你係唔正經女人,所以有個男伴係比較好喎⋯ 嘿! 西方人思想真係幾開放噃~
45-min路程到達山洞,入場費$10000-KIP($10-HKD),呢個山洞真係用探險來形容! 因為洞穴內係一條水澗,去到洞內看不見盡頭及望落水好深既地方,好似金庸小說裡常常講,穿過水流就別有洞天,唔知搵唔搵到姑姑呢?我唔夠膽再深入,因為怕冷,並伸手不見五指, 看不見盡頭咁⋯ 而Juilen就哀求我,話叫埋我先夠膽入去喎,好!就捨命陪君子啦! Marie係水深及膝既地方等待,於是我同Juilen除剩條底褲,由Juilen帶住頭燈,游呀!!! 不過游幾吓隻腳又到地喎! 轉過彎已到盡頭! 不過見水流係水平線以下既洞穴流出,如要繼續睇黎要閉氣潛過去了⋯ 拿! 仲唔係姑姑個活死人墓! 我地就唔夠膽穿過了⋯
探險完重見光明,探險完感覺同Juilen友誼加深到莫逆之交咁呀! 佢又同我一樣35歲,似足我又鍾意講笑,又鍾意攝影~
@1730
遊入去探險
去完洞穴再向前行,都見有洞穴,但不太有趣,於是再行前少少就回程了⋯ 返住宿沖涼後去老闆間餐廳食晚飯,$25000-KIP($25-HKD) 是自助餐,見全是外國人; 睇黎呢個未被我地港人發現既偏僻小村,一早比其他國家既人去到發展起來了! 後來上網seach,猛暖呢個曾是與世隔絕既小村,直到上年即2013年先有電供應咋! 而google中文,只有內地及台灣人分享過既遊記,可想而知香港人⋯ 咳咳⋯ 因為香港人較為貪心,多數玩南部,連埋就近既柬浦寨等一齊玩! 從網上顯示,當地正興建一條陸路直達,呢種與世隔絕既感覺好快消失Lu...
我食飯後自己摸黑返去先,想享用露台既吊床痴呆一下,如來有人同我一樣諗法,返到去個西班牙女仔已係吊床上痴呆,好在有三張,唔使爭崩頭啫~
傍晚時份,瞓係稍微有動作就會輕微搖動既吊床上閉著雙眼,感受猛曖既寧靜。偶爾有一陣微風吹過,一呼一吸,周遭既空氣雖然充滿由樹木發出的二氧化碳,但依然瀰漫著一片青蔥。耳朵只聽到河流的流水聲,引擎聲、說話聲則通通欠奉! 置身其中,當然就係瞓係度乜都唔好做、唔好諗,靜心感受啦! 咁先係真正既洗滌心靈呀~ 一呆就呆左個多小時,仲瞓著埋tim!
(Day 8)猛曖—>琅橋
早餐後坐0930船回琅橋$25000-KIP,與法國情侶相擁道別; 法國情侶繼續沿河北上起碼7小時去猛跨再轉巴士去越南,但全部乘客都係回琅橋,售票處話無船北上,一係就包船,收取一百萬KIP,嚇到法國人呆左! 哈哈~ 最後要開船啦,best friend! 唯有講句good luck!
一個小時船程,落起傾盤大雨,加上河流暗湧,翻起大浪成身濕晒... 其實就算無風浪坐一小時都好辛苦,因為船身窄而長,大家要面對面坐,尤其我呢D高人,要長期曲住雙腳,再加上係木板櫈,個屁股都不太好受⋯ 所以聽日諗住坐7小時去琅巴班(琅勃拉邦)如落雨都有D想放棄...
返回琅橋,諗住比個藉口自己,聽日辛苦了要住好一點,於是尋找夢想住宿,睇過好幾間後,用以香港人來講絕對係值得既價錢入住!$318000-KIP($318-HKD) 叫Nong Kiau River Side Resort & Restaurant!
呢間住宿係對岸可見一間間既屋仔隱蔽在河邊既樹林當中,同我第二晚既住宿相似,唔同既係佢用豪華內形容,但始終都係無冷氣... (好在晚上開風扇都很涼)內裡用木材為主,牆身用滕,不失傳統色彩,最緊要房同露台之間全是落地大玻璃既門,隨時可打開出露台,不過較多昆蟲我無經常開,而露台就係無摭檔望住河景,望正日落!
Check in 後由早前既新加坡人帶我食人間美食,係一間好地道既餐廳,行到鬼咁遠,食新加坡人推介既Lao Curru,表面好普通,但食落難以形容,個湯類似龍蝦湯,是寮國咖哩,其他配料完全入晒味; 食野其間有一個老撾人走過來吹水,話認得我來自香港喎!原來前天我避太陽係洞穴外個棚柵瞓覺時見過佢一面,佢仲話當初以為我係本地人喎! 因為我又黑黑地,又學當地人咁隨便瞓覺,很有趣,哈哈~
話明要嘆梗係嘆多D啦! 先去做個傳統寮國傳統按摩先~ $60000-KIP($60-HKD) per hour,然後去河邊餐廳飲番杯特飲,再返酒店既露台望住個靚景乜都唔好做,等待日落。
係酒店回想起,自來到寮國後每晚住宿,都定時定候係屋頂有怪聲”喔噢喔噢”咁傳出,當地人叫係Cuco,應該係爬行類動物,住係屋頂內食蚊,昆蟲為生。