日本紀伊半島Day7.2 - 一齊入場睇棒球啦!Touch!

「當我進軍甲子園實現夢想後，做我女朋友啦!」

呢d劇情絕對安達充到一個極點，但日本年中真係唔知有幾多學生向心愛之人立此宏願，同時都代表唔知有幾多學生因為咁無左個女朋友，又或者去到甲子園決賽時會無啦啦比車撞

所以飯可以亂食，誓唔好亂發呀!（ar我諗野都幾黑暗ga wor）



好啦～以上事情係同今篇無關係ge~~~~~~~~~入正題啦～

棒球就係棒球，但甲子園唔係成日有比賽ga ma， 適逢太平洋聯盟的”歐力士野牛隊”對”東北樂天金鷲隊”的比賽於大阪DOME進行又fit到我行程wor

日本睇棒球，德國睇足球，呢個定律嚟ga嗎!

一於去感受下呢款日本人最愛既消遣活動有幾精彩啦!

咁我要係日本入場睇棒球賽可以點做呢？

首先可以Google下妳要去既城市有邊隊棒球隊，再入佢地官網就可以check到對賽日程schedule同比賽地點了

又或者可以直接search場地，例如Tokyo DOME，大阪甲子園等等，都會有活動schedule

至於買飛，有部份可以上網預購，有部份現場即時排隊買

大家都知日本網上購票成日都要手機number或地址有幾煩ga la，所以現場排隊買都未嘗唔係好事來的

我今次就係咁啦，好彩早兩個鐘嚟排隊，現場已有小蛇餅，排左陣望望後面已經變左大岩蛇了!

(大阪DOME駅)

價格方面，可能今次呢場唔係咩大賽，由1000yen至15000yen不等，都唔算貴，按區域劃分，不設劃位

係德國睇波我有經驗，同一area都可以有高山低谷既分別，要靚位都係早d入場霸位啦~

如果好似我咁都係太早的話，大阪dome旁的shopping mall都幾多野行，我就係咁破費左對鞋同個銀包…..完全係陷阱lai ga………

如果只剩下1個鐘就開戰，我奉勸各位都係入去ready下吧啦~

唔使怕悶ge，因為會場內有大量紀念品檔及食肆~

就好似火車便當一樣，球場便當都係日本文化既一部份，漢堡扒、八爪魚丸、炒麵、KFC等等乜都有，不過都係無單邊燒鵝脾的

原本都想買個便當一試佢龍與鳳，可惜今晚約左人食飯，只能輕嘆無緣了~

(紀念品當然唔少得~)

除左便當，啤酒都係睇波唔少得!

去得日本人越多就越覺得佢地對啤酒既狂熱係超乎你想像! 一個球場內大大話話都起碼有10來個啤酒女郎行上行落! 而且生意仲唔錯!

有別於香港，呢班啤酒女郎唯一既任務就係賣啤酒(???????)，佢地要孭住一大個酒桶通山跑，邊行邊用清晰卻嬌柔的日本語說「bi bi ga ga disc卡」(大約係咁)，睇緊波既你想飲時就叫佢過lai，她會即時囉條水喉沖杯新鮮beer比你~

我其實係無諗過飲酒的，但係，有一個賣啤酒的女孩，實在太靚太kawaii啦……

果個陽光般燦爛既笑容，水瑩瑩的大眼睛，爽朗而不失溫柔的氣質，櫻桃小咀輕輕吐出一句「bi bi ga ga disc卡」..........wa!!!!!!!真係成個人都軟哂!!!!!(無任何我有病既含義在內)

回神過來，手上已經多左杯啤酒了

朋友話點解唔同佢影相撩講野約佢食飯就地正法等等等等

我夠想啦，但聽聞工作中的啤酒女郎係唔比影相的。如果要Johnny(強尼)的話……..妳望下佢個full啤酒桶有重先得ga……呢種體力同肌肉強度應該同擔泥無咩分別，你試下阻住地盤佬做野會有咩後果ar la…….

所以，我都係影下個球場算了~

哎呀--------唔覺意有個粉紅色衫既女仔入左鏡tim~~~~~

喂唔好放錯重點! 我係來睇波ga!

在此，我要非常感謝我中學時代既老師PE黃，係體育堂將一大堆唔知係乜料既疊球規則硬塞比當時悶到嘔既我地，起碼我而家都知咩叫3振出局同童夢幻影球先，但盜壘ar果d複雜野就靠維基了

儘管如此，我都係睇得津津有味~

不論是球場上的熱烈拼搏，擊球接球的爆發一瞬，以至雙方球迷戮力以致的叫喊支持，都令我呢個第1次睇棒球比賽既門外漢完全溶入於球賽當中

話之你睇唔睇得明~

總之跟住主場球迷-----「打中」---- 嗌! 「接實」----- 嗌! 「失分」----- x!

忘掉日常生活的不快，係呢個球場上盡情呼喊啦!

 

可惜的是，由於約左住在大阪的親人食飯，只能睇1個鐘仍然0 : 0平手就要走了

引用一句小學生的作文名句 ----- 希望下一次會有機會再來啦! 唔夠喉呀!!!!



親人食飯屬私人性質~按下不表~

只記得阪急頂樓間炸豬排專門店好味!

下回講住宿~



================



My Facebook Page :  www.facebook.com/Garcia.in.Germany

Utravel Blog : http://blog.ulifestyle.com.hk/blogger/aeolusgarcia/

Instagram : https://www.instagram.com/fung_garcia/

DCFever - Fever Travel : http://www.dcfever.com/travel/utravelogue.php?id=799202

Email : funggarcia@gmail.com

請各位繼續多多支持呀!!!!!!!!!!!!!!!