青衣自然徑︱馬灣海峽+青馬大橋無敵日落美景【香港郊遊10】

 

 

今次要講既另一條「食完飯無野做想行就行」的市區行山路線 ------- 「青衣自然徑」

同好hit既「青衣三支香」行山路線唔同，果條係青衣南，呢條係青衣西  ----- 一條for晨運用的輕鬆散步徑

「青衣自然徑」利害的地方唔係因為佢西，而係佢鄰近市區出入方便，仲非常非常易行! 長者小孩都絕無問題~

更重點係沿路望住青馬大橋全海景日落嚟行!

方便、易行、有靚景，一次過滿足哂三個願望! 好難唔大力推薦下wor!

  

(就係因為你西，唔使講野!)

 

 

內容概要:

1. 交通方法
2. 「青衣自然徑」北面入口
3. 3號觀景亭休憩處
4. 由青瞰徑轉青雲徑至2號觀景亭
5. 1號觀景亭無敵日落
6. 葵青慶回歸個名好7健康徑至南面入口離開 

 

+++++++++++++++++++++++++++

 

• 之前的「食完飯無野做想行就行」的市區行山路線:

《【香港郊遊002】簡單快速+靚景，龍蝦灣郊遊徑》

 

《【香港郊遊005】沙田行去慈雲山，原來超級簡單》

+++++++++++++++++++++++++++

  

• 交通

「青衣自然徑」位於青衣西北方，長宏村隔離

定位係「晨運路徑」，設計上本身就係比老人家小朋友和12隻恐龍去野餐的，咁條路難極有限啦~

事實上「青衣自然徑」的樓梯非常少，上落都只係兩三次左右，大部份平路，就算腳力唔好既朋友應該都能應付自如~

 

 

 

 

 

 

廢話少講~ 起行啦~

今次我選擇由北面入口開始~

由青衣城坐248M約10分鐘至長宏村總站，落車面前駛入嚟條馬路轉左行上斜，約5分鐘就會見到入口了~

 

 

(轉左，圖中小巴果個位向上行)

 

 

 

 

 

• 「青衣自然徑」北面入口

使唔使一開波就整條咁長既樓梯呀!!

不過放心唔好比佢嚇襯，細細級好易行，而且往後咁長既樓梯都無乜了

先苦後甜下先啦~

不過建議大家唔好行太慢，好鬼多蚊…….

 

 

 

 

一行完樓梯幾步已有野睇，

呢個好似係船廠同汀九橋吧~

 

 

 

 

睇地圖好似好遠，但10分鐘已經來到第一個check point 4號觀景亭

理論上唔會需要係度休息ge，繼續行啦~ 分叉路行右去3號觀景亭呀~

 

(4號觀景亭)

 

 

• 3號觀景亭休憩處

行多15分鐘就到達3號觀景亭休憩處~

呢度景觀無乜，不過地方大兼有好多正常單槓及土炮單槓，仲有平衡木，十足一個小型體操訓練場

基於呢條係晨運徑，可以想像清早時分該有唔少銀髮阿伯係度練習度卡卓夫前空翻

 

 

 

 

 

 

(《我要高飛》藤卷駿自創的度卡卓夫前空翻，呢套漫畫都唔算好偏門je~) 

(得呢張影得清，因為鏡頭後我做緊胸部旋轉大迴環)

 

 

 

• 青瞰徑轉青雲徑至2號觀景亭

最後我簡單做個4周空翻落地飲啖水就繼續行了~

由青瞰徑轉青雲徑，向野餐區及1、2號觀景亭進發~

呢段路可以見到唔少有趣的動植物~

就算唔計只聞其聲不見其形的各種雀鳥，我路上所見都有石龍子、大紅花，仲有背光的白千層~(好似係)

 

 

(大紅花，好似係)

 

 

(石龍子，我阿爸話即係「草龍」，雀仔最鍾意食，咁大條點食ar.......)

 

(白千層，好似係)

 

 

但呢d都唔係呢段路既重點~

行不多遠，轉眼間已到青衣自然徑的最高點!

成個馬灣、大嶼山同青馬大橋係正面前呀!!!!!!!!

 

 

 

成個馬灣海峽被陽光照射得閃閃發光~

所以如果妳預早無提醒同行女伴搽防曬的話，佢一定會殺左你

但如果真係唔記得ge話，都有補鑊方法ge~

 

「傻豬~ 黑黑地咪幾靚幾健康，仲可以搵多d錢tim~ 妳聽日去禁門鐘講一句5字真言，人地就會打開門比份工妳ga la~ 果5個字就係……….」

 

如果有講得哂以上54個字都未死得既男士，記得留個言話我知!

 

(馬灣海峽)

 

(馬灣海峽)

 

(後面可見青衣全貌，都唔錯，但個馬灣海峽view實在太強大啦!!!!)

 

 

 

如果覺得山頂太多人太多樹唔岩打卡ge，無問題~繼續前行啦~

一直去到野餐區1及2號觀景亭都有同一個靚View大把機會影相~

而且真係睇極都唔悶，香港真係好靚呀!!!!

 

 

 

 

 

 

 

 

 

 

 

 

 

 

• 1號觀景亭無敵日落

由2號觀景亭至1號觀景亭條路係屈返入內陸，風景雖然無之前咁靚，但路段以平坦，輕鬆易行，可以盡情享受郊遊的樂趣~

 

 

 

 

 

 

 

 

原本我都放棄左日落，因為岩岩青雲徑一段雖毫無疑問絕對會睇到，但日入後仲有一大段路黑嗎嗎唔太穩陣

誰一知真正最佳的日落觀賞位置，竟係路程尾段，1號觀景亭行出去的山坡!

 

(1號觀景亭由此路進~)

 

(呢個山坡咁樣睇好似無乜野，但睇下下圖既右手邊--------)

 

 

 

講真呢個景真係世界級，對比起歐洲國家的日落都毫不遜色，絕對有一拼之力

儘管係深井果邊都有得睇汀九青馬大橋靚view，但要將馬灣、大嶼山同青馬大橋三者結合，再加上日落美景，細看夕陽西沉於大海彼岸，也許只有這裡才做得到!

 

 

 

 

 

++++++++++++++++++++++++++++

 

• 延伸閱讀 : 

《【德國working holiday第四十八章】 腓特烈港的日落》

《【德國working holiday第六十一章】聖彼得堡下篇，凍到唔係路!》

《【漫遊保加利亞5】Plovdiv文化小鎮一日遊》

 

++++++++++++++++++++++++++++

 

• 葵青慶回歸個名好7健康徑至南面入口

睇完日落就好快d落山啦!!

呢條「葵青慶回歸健康徑」沿路幾乎無街燈ga!

不過由1號觀景亭至南面入口離開都係行15-20分鐘左右je~左邊有巴士小巴站返青衣城~

「青衣自然徑」，非常快成功行完!

 

 

 

 

 

 

最後例牌總結下啦~

1. 如果齋行，我相信1.5小時一定行得完全程! 但由於風景實在太靚，計埋中途影相打卡及等左近半小時日落，最終用左約3小時
2. 全程路上落起伏不大，平路為主，平時懶做運動又或長者相信都可輕易應付~
3. 有d朋友鍾意由南方入口進入，即係我呢條路逆行，不過咁行上樓梯會比較多，depends on閣下喜歡啦~
4. 沿路雖有垃圾桶，但最好當然都係帶走自己既垃圾啦~

 

 

 

 

 ===========================

 

請大家Follow我Instagram啦~

 

 

• Instagram : https://www.instagram.com/fung_garcia_backpacker/

 

 

 

 

 

 

=====================================

 

 

我既YOUTUBE CHANNEL正式開通啦!!!!

 

新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~

 

 

 

 

 

=================================

 

相關篇章 :

 

• 香港郊遊

《004 - 赤徑與鹹田灣，宛如沙巴的美麗海灣》

《005 - 沙田行去慈雲山，原來超級簡單》

《006 - 大埔三門仔，零難度的全海景輕遠足》

《007 - 西貢大灘郊遊徑，長者行山無問題》

《008 - 飛鵝山芒草之行》

《009 - 粉嶺鹿頸至谷埔︱夕陽下的隱世蘆葦田》

 

 

 

• 發掘香港

《1 - 香港Staycation首選，皇家太平洋酒店住後心得》

《2 - 城市步行︱鯉魚門的絕美日落》

《2.5 - 鯉魚門石礦場︱夕陽下的芒草群》

《3 - 己連拿利︱港島攝影秘景，宛如荒涼未來的異世界》

 

================================

 

 

• Email : funggarcia@gmail.com

 

• www.facebook.com/Garcia.in.Germany

 

• https://mewe.com/p/fung_garcia_backpacker

 

 

 

文章同時刊於以下平台，請各位多多支持呀!!!!!!!!!!!!!

• UBlog
• DC Fever Travel
• Blogspot 
• 遊牧爆谷
• Medium

 

 

 

 

 

 

 

 

 

 

 

 

 

 

 

 

 

 

更多香港旅遊攝影資訊