北陸之行3 - 呢間野食乜ga??

這是一間必需要記下的小店

 

事源於由宇奈月溫泉去到富山市過一晚(北陸之行1)，係酒店職員介紹下去左富山城商店街「總曲輪」搵野食，之但係行嚟行去見d店都係三幅被，都係無d特色既魚魚魚魚魚，一d興趣都無

苦惱之際，於街內某十字路口轉角位，有一大型寫住”BAN”的黃色招牌令我地駐足不前

本身我同阿哥就對黃色招牌不感興趣，吸引我地目光既係招牌下方banner的一大塊吉列炸物，形狀奇特又有d核突，重點係我地完全唔知呢塊究竟係咩嚟!?

係日本生活多年既阿哥望左陣個menu ------- 「我完全唔知呢d係咩嚟!」

咁神秘???????????

我地兩兄弟都係好奇心旺盛怪，再見到店外放住幾張大排檔feel方型摺枱，幾個大叔大杯酒大聲笑豪氣干雲，咁好feel，晚餐就來一趟獵奇之旅啦!

 

 

 

雖然話大膽嘗試，但無理由一開始就叫個滿漢全席出嚟ga!

試探性點左一個老闆推薦既冷盤同湯，再手指指banner果塊古怪野，以上~

等待上菜期間，我地咩新奇古怪食物都估過，炸小棠菜炸兔仔頭炸鯉魚旗…………

10分鐘後，上菜了，樣子真係同banner上相差無幾wor……

 

 

好啦，一如以往(個”以往”由伊朗獨行17開始)，大家有10秒鐘時間估呢舊究竟係咩嚟~

…………………………………………………………….

………………………………………………………..

………………………………………………….

………………………………………..

……………………………….

開估!!!!!!!!!!!!

咩料呀!!!!???????

係吉列豬膶呀!!!!!!!!!!!!!!

由細到大既認知，豬膶都係煲粥煲水煲公仔麵，最多囉嚟啫啫雞煲or薑蔥及第，幾時會聽過話醬汁吉列ga????

但又估佢唔到，咬開有汁ga!!! 滑、脆、嫩! 更完全無豬膶常見既血腥味! 好食到不得了!!!!

而推薦冷盤原來係麻油豬肚絲，撈埋芝麻、青蔥、薑蓉和蘿蔔蓉，爽脆清新，有大排檔撈魚皮既感覺，佐酒一流!

湯汁則是蘿蔔大腸湯，鮮美唔腥，在此微涼的晚上熱騰騰的喝一口實在幸福無比~

 

 

 

睇到呢度大家都知，無錯，原來呢度一間豬雜專門店!

只係淺嘗過以上3種食物，我地已經決定要係呢間小店叫九大簋食到飽!

係我地內臟會高尿酸，但就襯而家仲有少少後生而滿足佢啦!

 

 

(醬汁燒大腸 --- 將豬大腸飛水後切開攤平炭火燒+醬汁，外脆內軟帶焦香，同香港炸大腸完全係另一味道!)

 

 

(鹽燒豬喉管 --- 唔使香港打邊爐果d乜味都無得個脆字，師傅處理時刻意留有肉塊脂肪，令味道濃郁，香味十足!)

 

 

(表面睇以為係粉腸，但食落原來係生腸! 即係肥x小食店染到紅色好貴一串果d!

同大腸一樣同醬汁燒，但加左少少辣，又一完全不同口感!)

 

 

(上面幾樣太新奇有趣，令鹽燒豬舌芯味道變得意料之中，不過仍彈牙鮮美好好味!)

 

 

(黑胡椒燒雞翼調味雖最好，但雞翼來貨不佳雪味太重，失望)

 

 

(厚燒玉子竟然真係用炭火燒! 超級綿滑! 超重蛋味! 食完即刻Encore左!)

 

 

(啤酒當然唔少得啦~)

 

仲有叫左好多野食但唔記得影相，總之樣樣都係新奇有趣兼非常好味!

日本人係居酒屋味噌雜煮有豬腸唔奇，但以串燒形式來製作真係聽都未聽過! 仲要咁多花款!

同老闆傾左幾句，佢竟然識講幾句普通話?????

「我曾經在上海做過3、4年廚師，而家老婆係台灣人~」轉過頭就囉左個中文menu出嚟…………………..

我同阿哥一陣無奈……………早知唔使估得咁辛苦啦……….不過阿哥話有都無乜用，因為中日menu既排版位完全錯哂，根本唔會叫到妳想叫既野……..

 

 

 

我地再問老闆 : 富山或者日本係咪好多呢種食肆?

「um…….呢間店係照我自己意思想開的，可能全日本只得我呢一間專賣呢d野」

未知是否屬實，但我粗略google過，的確只在多年前一篇飲食專欄見過東京有一隱世豬雜刺身店，風格明顯大不相同!

呢間毫不起眼的小館，同一樣既食材做不一樣既煮法，每一口每一啖都是驚喜，完全帶我地開拓左一片飲食既新天地!

最後老闆笑說生意難做，有機會必定要幫他宣傳一下~

如此風味十足的美味小店，放心，我不負所託!

 

 

 

 

======================

《もつ焼き BAN 》

 

地址 :富山県富山市総曲輪3-3-21

人均消費 : 約2000yen

 

https://tabelog.com/toyama/A1601/A160101/16008195/

 

 

====================

 

Email : funggarcia@gmail.com

 

Instagram : https://www.instagram.com/fung_garcia/

 

My Facebook Page : www.facebook.com/Garcia.in.Germany

 

 

另外文章同時刊於UBlog、 DC Fever Travel、 Blogspot 及遊牧爆谷

 

請各位繼續多多支持呀!!!!!!!!!!!!!!

更多日本旅遊攝影資訊