二零一五年九州十天新春自駕遊－Day 2
經過一夜充電，第二朝一早又係出發嘅時候。今日預定嘅行程係福岡－門司－唐戶市場－小倉城－あるある City 動漫。
未出發，先食早餐。
早餐我地選擇喺酒店食，點解？因為酒店近攞車處囉。喺 Google
地圖用人仔試吓行，睇過哂邊度有過馬路嘅設施，邊度過馬路都知道，到腳踏實地去行時，根本好似由屋企行去巴士站咁熟路，完全無難度。
去到豐田租車，攞車時先望吓架車有花痕。今次佢地俾架近乎新嘅車我，只行了一千三百幾公里，到我還車時已經三千七百幾。其實揀豐田租車有個好處，就係佢地嘅辦事處就好似七仔咁，總有一間喺左近。
攞車之後就正正式式開始我地嘅旅程。
第一站－門司港
去到門司港，感覺係勁大風，凍。見到個泊到架車埋去嘅街邊位，人地咁泊，照辦煮碗，唔理三七廿一泊埋去，最終都無事。不過時間關係，門司港已經係走馬看花。先睇到音樂藍橋。
音樂藍橋，日本唯一的步行吊橋，以往每隔一小時就會把橋吊起，讓船隻進入門司港。現今已再沒船隻通過，但每天仍會在音樂伴奏下開啓六次。
舊門司稅關－明冶建築
1912年建成，是門司貿易經濟繁榮時期興建的著名建筙物。
內裡地下正展覽着這些人偶。
商店街的一些店舖
時間關係，怱怱的來、怱怱的走，雖然還未走畢，都只好往下站走。
唐戶市場
因為行程編排關係，正好這天是市塲的 Day off。
所有的海鮮檔無開，只好幫襯場入的海転から市場寿司，又唔錯喎，樣樣新鮮，仲有唔少本地人排隊幫襯。
祭完五藏廟，又起程到下一站－小倉城。
其實睇過日本幾個名城，感覺都係一般，甚至覺得睇完一個、兩個後，可以唔使再睇其他，因為都係差不多(當然，各有所好，以上都係個人觀後感)。
如果有人問日本有咩叻？我答模型相信無咩人會反對，上至咸蛋超人打怪獸場境，下之屋企玻璃櫃嘅高達，一樣無得頂。小倉城內就有一個如此這般的模型場境。
横掂都唔知噏乜，都係往下站出發。
あるある City －動漫迷其中一個朝聖之地
City內有宇宙海盗展館
往 City 前會見到呢啲銅像。動漫迷去到呢到，博殺得幾咁慘烈，想信唔使圖片介紹都可以幻想得到，所以慳番啲功夫。
博殺完就去食嘢，晚餐選定－博多名物 もつ鍋 笑楽 (牛腸鍋)
話就話牛腸鍋，但係其實。。。。。。。
感覺好多菜。點都好，食完就返酒店休息，準備第三日所需的精神。
