二零一四年北海道七天新春自駕遊－序章

過往幾年，每次新春旅行都是跟旅行團，今次來個自遊行、來個自駕遊，帶來一個翻天覆地的新體驗。

先定好時間：一四年二月六日出發，二月十一號返。

第一次計劃行程，真係老鼠拉龜。買咗幾本自遊行旅遊書再上網猛摷人地嘅遊記嚟索料，甚至睇埋旅行社的行程表。好不容易才訂好一個屬於李門這一家的獨有行程。

這次行程只會去幾處地方：札幌、旭川、小樽、登別和函館。原本打算去旭川時；順便去埋富良野，不過因為正當落雪季節，無薰衣草睇，所以取消這部份的安排。當時定好行程真係好興奮，行程安排得好唔好，無所謂，最緊要係完全照自己意思去做。

行程有了大綱後，就要訂機位和酒店，屋企位最高領導人喺網上搜集咗好多酒店資料，但為咗穩陣起見 (最主要係唔識)，唔想有任何差池，所以幫襯好專業嘅旅運代辦，當時嘅諗法有啲錢係要畀人賺嘅。機票訂咗 6 號 09：15起飛，回程則在 11 號 16：00 飛。因機場在札幌，所以順理成章；成為這次行程的中心點。酒店，會在頭三日和第六晚在札幌住同一間，而登別和函館各住一晚。這樣有個好處，就係可以將部份行李 (包括喺札幌買到嘅嘢) 寄存，唔須要帶住三大個喼穿洲過省。

好喇，機票同酒店搞掂好，到租車。第一個接觸到嘅租車網係日本豐田，可能 (絕對)係在香港揸開呢個牌子，所以自自然然投返去佢懷抱 (仲做埋佢嘅會員添)。話時話，第一次會在雪地揸車真係好緊張，有好多考慮，首先係車款、性能。

揀咗架 RAV 4因為個樣似四驅，車內空間夠大，而事實上夠力，夠定，去到百五架車仲好穩定，雪地落山路，個加減波又幫到手，ABS 梗加係重中之重 (講係咁講，總之唔好完全依賴佢)，無揀錯。至於車轆要唔要縛上鐵鍊？我就無，而我亦無見當地人有用到，但唔代表唔會出事，而結冰嘅路面先係最危險。

車都租埋，輪到攞番個國際牌。第一次攞，咩都唔識，我揀咗去呢度申請：

準備 $80、相兩張，佢會要求提供地址證明，但係提供唔到又點呢？我選擇以非常抱歉嘅態度同職員講唔記得帶，下場就係好順利地出到個牌。第一次見到個國際牌，綠色咭紙、釘上幾張疑似影印出嚟嘅列表，喺張相上蓋上個印，對唔住，我真係覺得國際通用嘅證件真係咁兒戲？我真係懷疑我有無攞錯證件？

去日本旅行，真係好方便。雖然人生路不熟，但佢地嘅配套做得認真一流。GPS 除了可輸入電話便可帶你到目的地外 (試過輸入一間樓上舖的電話，一樣可以帶我到該舖所在的建築物) ，還可輸入日本本身一套 Mapcode，亦同樣可以去到要去的地方。要找到目的地的 Mapcode 可以在透過 Mapion 找到，當找到地點後，在目的地上左 click 一下，地點便會移到螢幕上紅十字點位置，再將鼠標指向網頁右上角的 便利ツール 位置，再選擇地図 URL，就會出現下面的畫面：最下面那組的數字就是 Mapcode，非常方便。

去到呢度已經準備得八八九九，記住，北海道羽絨褸同手套真係不可少。

更多北海道旅遊攝影資訊